ശാന്തസുന്ദരവും പ്രകൃതിരമണീയവുമായ കാതിക്കുടത്ത് 1938 മാർച്ച് 6-ാം തീയതി ഗോപുരൻ അന്തോണിയുടേയും മറിയത്തിൻ്റെയും മകനായി അമ്മ വീടായ കൊരട്ടി മഞ്ഞളി അന്തോണിയുടെ വീട്ടിൽ ഇരട്ട മക്കളിൽ ഒരാളായി ജനിച്ചു. 7-ാ00 ദിവസം മാമ്മോദീസ മുക്കാൻ കൊണ്ടുപോയപ്പോൾ മൂത്തയാൾക്ക് ഔസേപ്പന്നും, അടുത്ത യാൾക്ക് മാത്യുയെന്നും പേര് ഇടാൻ തീരുമാനിച്ചു. ആളു മാറിപ്പോവാ തിരിക്കാൻ ഔസേപ്പിൻ്റെ വലത് കയ്യിലും മാത്യുവിൻ്റെ ഇടത് കയ്യിലും ചരട് കെട്ടി കൊണ്ട്  പോയവരോട് പറഞ്ഞൽപ്പിക്കുകയും ചെയ്‌തു. എന്നാൽ കൊണ്ടു പോയവർക്ക് മാറിപ്പോയി ഒസേപ്പിന് മാത്യുയെന്നും, മാത്യുവിന് ഔസേപ്പെന്നും പേരിട്ടു. അങ്ങനെ മൂത്തയാൾ മാത്യുവായി. അന്ന് അമ്മമാർ മാമ്മോദീസക്ക് പള്ളിയിൽ പോകുന്ന പതിവില്ലായിരുന്നു. രണ്ട്‌പേരും ചുണകുട്ടികളായി വളർന്നു. കല്യാണം കഴിക്കാത്ത വല്യപ്പൻ (അപ്പൻ്റെ ജ്യേഷ്ഠൻ) വീട്ടിലുണ്ടായിരുന്നു. ഈ ഇരട്ടകുട്ടികളെ വല്യപ്പന് വലിയ ഇഷ്ടമായിരുന്നു. ചോറുണ്ണുമ്പോൾ ഓരോ ഉരുള രണ്ട്‌പേരുടേയും വായിൽ വച്ച് കഴിപ്പിച്ചിട്ടേ ഊണ് കഴിക്കാറുള്ളൂ. കുട്ടികൾക്ക് 5 വയസ്സായപ്പോൾ സ്ക്കൂളിൽ കൊണ്ടു പോയി ചേർത്തതും വല്യപ്പനായിരുന്നു. കുട്ടികൾ നന്നായി പഠിക്കണം എന്ന് അപ്പനും, വല്യപ്പനും ആഗ്രഹിച്ചു. കൊരട്ടി സ്‌കൂളിലെത്താൻ 3 കി.മീറ്റർ നടക്കണം. ഉച്ചയ്ക്കുള്ള ചോറ് ഒരു പൊക്കമുള്ള പാത്രത്തിൽ രണ്ടു പേർക്കും കൂടി കൊടുത്തു വിടും, പകുതി ദൂരം ഒരാൾ ചുമക്കും.. പകുതി ദൂരം മറ്റയാളും.. രണ്ടുപേരും ഒന്നിച്ചിരുന്ന് ഒരു പാത്രത്തിൽ നിന്നാണ് കഴിച്ചിരുന്നത്. പഠിക്കാൻ രണ്ടു പേരും മിടുക്കരായിരുന്നു. സ്‌കൂളിൽ അവർ ഒന്നാം സ്ഥാനത്ത് തന്നെ ആയിരുന്നു. 10-ാം ക്ലാസ്സിൽ സ്ക്കൂളിൽ ഏറ്റവും കൂടുതൽ മാർക്ക് മേടിച്ചതും അവർ തന്നെ. MAMHS -ൽ പത്ത് കഴിഞ്ഞപ്പോൾ വല്യപ്പൻ രണ്ടു പേരേയും വിളിച്ചു. നിങ്ങൾക്ക് എവിടേയ്ക്കാണ് പേകേതെന്ന് പഠിക്കാൻ എന്ന് ചോദിച്ചു. ഉദ്ദേശിച്ചത് ഏത് സഭയിൽ അച്ചനാകാൻ പോകേണ്ടതെന്ന കാര്യമാണ്. അങ്ങനെ മാത്തു CMI സഭയിലേക്കും ഔസേപ്പ് (ജോസഫ്) അതിരൂപതയിലെ മൈനർ സെമിനാരിയിലേക്കും പോയി. രണ്ടു കൊല്ലം കഴിഞ്ഞപ്പോൾ ജോസഫ് അത് വേണ്ടെന്ന് വച്ച് മടങ്ങിപ്പോന്നു. മാത്തു (മാത്യു) 6 കൊല്ലം കൂടി അവിടെ തുടർന്നു.